3-nji iýulda ABŞ-nyň Türkmenistandaky ilçihanasy ABŞ-nyň Garaşsyzlyk Jarnamasynyň 249 ýyllygy mynasybetli dabaraly kabul edişlik geçirdi. Dabara diplomatlar, döwlet we jemgyýetçilik işgärleri, medeniýet wekilleri hem-de habar beriş serişdeleriniň wekilleri gatnaşdy.
Dabaranyň başynda myhmanlary ABŞ-nyň Türkmenistandaky ilçisi Elizabet Rud gutlady. Ol türkmen dilinde çykyş edip, azatlyk, garaşsyzlyk we bagtyýarlyga ymtylmak ýaly gymmatlyklaryň ähmiýetini belledi. Ilçi hyzmatdaşlyk üçin minnetdarlyk bildirip, aýratyn-da, Eýrandan ABŞ-nyň raýatlarynyň çykarylmagynda beren goldawy üçin Türkmenistana aýratyn sagbolsun aýtdy.
Türkmen tarapyndan Mejlisiň Başlygy Dünýägözel Gulmanowa çykyş etdi. Ol ýurduň ýolbaşçylarynyň adyndan gutlaglary ýetirdi hem-de bu baýramyň azatlyga ymtylmagyň nyşany hökmünde ähmiýetiniň uludygyny aýtdy. Parlamentiň ýolbaşçysy döwletara dialogyň, ykdysady we ynsanperwer gatnaşyklarynyň, şeýle-de ekologiýa hem-de medeni mirasy gorap saklamak ugurlaryndaky bilelikdäki taslamalaryň ösüşini belledi.
Dabaranyň barşynda Jessika Linniň ýolbaşçylygyndaky amerikan kantri-rok aýdym-saz topary çykyş etdi. Ozal habar berşimiz ýaly, aýdymçynyň Aşgabatda iki konserti meýilleşdirilen – 5-nji iýulda “Türkmenistan” kino-konsert zalynda, 6-njy iýulda bolsa “Arkaç” söwda-dynç alyş merkezinde geçiriler.
ABŞ-da Garaşsyzlyk güni 4-nji iýulda bellenilýär. Şol gün – 1776-njy ýylda, Pensilwaniýa ştatynyň Filadelfiýa şäherinde ikinji Kontinental kongres tarapyndan, esasan hem Tomas Jefferson tarapyndan taýýarlanan Garaşsyzlyk Jarnamasy kabul edilipdi. Bu resminama öňki britan koloniýalarynyň ilkinji gezek “Amerikanyň Birleşen Ştatlary” ady bilen resmi taýdan tanadylan ilkinji resminamasy boldy.
