Portugaliýanyň asmanynda seýrek atmosfera hadysasy – rulon görnüşli bulut peýda boldy. Bu hadysa Powoa-de-Warzin, Wila-du-Kondi, Figeýra-da-Foş we Owar sebitleriniň kenarlarynda dynç alýan adamlary hem haýran galdyrdy, hem gorkuzdy diýip, Notícias ao Minuto habar berýär.
Rulon bulut (volutus) beýleki bulutlardan bölünip aýrylan, uzyn silindr şekilli bulutdyr. Meteo Trás-os-Montes platformasynyň hünärmenleriniň düşündirişi ýaly, ol kenarýaka zolagynda ýyly we sowuk howanyň duşuşmagy netijesinde emele gelýär. Şeýle bulut ýokaryk galmaýar-da, keseligine ýaýrap, uly tolkun depesine meňzeýär.
Şeýle hadysalar Portugaliýa üçin seýrek bolsa-da, olara öň hem syn edilipdi. 1999-njy ýylda şeýle bulut Algarwe sebitinde peýda boldy. Şol wagt ol hakyky dowul döretdi – dynç alýan adamlar ony sunami hökmünde kabul edip, kenardan gaçmaga howlukdy.
Rulon bulutlary dünýäniň diňe bir sebitinde – Awstraliýadaky Karpentariýa aýlagynyň günortasynda yzygiderli hasaba alynýar. Bu ýerde olar morning glory cloud hökmünde belli bolup, aýratyn klimat we geografiki şertleriň netijesinde ýüze çykýar.
