Blue Origin kompaniýasy ýolagçylar bilen 13-nji suborbital uçuşyny üstünlikli geçirdi. Bortunda alty syýahatçy bolan New Shepard raketasy 29-njy iýunda ABŞ-nyň merkezi wagty (CDT) bilen 9:39-da Günbatar Tehasdaky Launch Site One meýdançasyndan uçuşa başlady.
Howa şertleri sebäpli uçuş 21-nji iýundan 29-njy iýuna geçirilipdi.
The Solstice 33 ekipažynyň düzümine är-aýal Elli we Karl Kýuner, Liland Larson, Freddi Reskinýo-kiçi, Owolabi Salis we Jeýms Sitkin girdi. Olar dürli hünärleriň wekilleri bolup, ikisi hukukçy, beýlekiler ekolog, elektrik geçirijisi boýunça distribýutor, gurluşyk kompaniýasynyň başlygy we transport kompaniýasynyň öňki baş direktorydy.
NS-33 missiýasy 10 minut töweregi dowam etdi. Raketa 105,2 km belentlige ýetip, Karman liniýasyndan geçdi. Bu Ýeriň atmosferasy bilen kosmosyň arasyndaky serhetdir. Ýolagçylar birnäçe minut agramsyzlyk ýagdaýynda boldy. Tail 5 hereketlendiriji moduly we RSS Karman Line kapsulasy Ýere üstünlikli gaýdyp geldi.
Kosmos gözlegleri assosiasiýasynyň maglumatlaryna görä, Karl Kýuner Blue Origin-iň 70-nji astronawty we kosmosda bolan 750-nji adam boldy. Astronawtyň belgisi uçuş üçin saýlanan kapsuladaky orny boýunça kesgitlenýär.
Şeýle-de, kapsulanyň bortunda Club For the Future taslamasynyň çäklerinde mekdep okuwçylary tarapyndan döredilen 1000-den gowrak otkrytka bardy. Olary Sietldäki Uçuş muzeýi we Kanadadaky Parkcrest başlangyç mekdebi taýýarlady.
NS-33 üçin petekleriň bahasy aýdylmaýar. Assosiasiýanyň maglumatlaryna görä, häzire çenli Blue Origin-iň suborbital uçuşlaryna 123 adam gatnaşdy.
