XC60 krossoweri Volvo-nyň taryhynda iň köp satylan modeli boldy. Kompaniýanyň maglumatlaryna görä, onuň umumy satuwy 2,7 milliondan geçdi.
Mundan ozal, rekord Volvo 240 modeline degişlidi. Bu ulag 1993-nji ýylda önümçilikden aýrylypdy we onuň umumy satuwy, takmynan, 2,68 million bolupdy.
XC60 bazara ilkinji gezek 2008-nji ýylda çykdy. Ilki bilen diňe Ýewropada satyldy, soňlugy bilen bolsa kompaniýanyň dünýä derejesindäki ilkinji modeli bolup, beýleki ýurtlarda, şol sanda Hytaýda hem peýda boldy. Kompaniýa XC60 modelini 240 uniwersalynyň oruntutary hökmünde häsiýetlendirýär. Şeýle-de Volvo 240-y bolan maşgalalarda ulalan köp sanly adam häzirki wagtda maşgala ulagy hökmünde XC60-y saýlaýar.
Şeýle hem Volvo täze model ýyly bilen XC60-yň birnäçe täzeliklere eýe boljakdygyny habar berdi. Täzelenmeler dizaýna, interfeýse we media ulgamynyň iş tizligine, şeýle-de sürüş rahatlygyna degişli bolar. Bu üýtgeşmeler barada häzirlikçe doly maglumat berilmedi.
Geçen ýylyň güýzünde «Autocar» britan neşiri dünýäde iň köp satylan awtoulaglaryň sanawyny taýýarlady. Bu sanawda modelleriň umumy öndürilen sany göz öňünde tutuldy. Volvo 200 maşgalasy şol sanawda iň soňky orunlaryň birinde ýerleşdi. Ilkinji orunlary bolsa Toyota Corolla, Ford F-Series we Volkswagen Golf eýeledi.
