Beýik Britaniýanyň futbol boýunça ýygyndysynyň öňki oýunçysy Dewid Bekhem 22 ýyl mundan ozal alan şikesiniň netijesinde bileginde operasiýa geçirmeli boldy. Bu barada britan metbugaty, şol sanda The Sun gazeti habar berýär.
2002-nji ýylyň maýynda Günorta Afrika bilen geçirilen ýoldaşlyk duşuşygynda Bekhem garşydaşy Tabango Molefe tarapyndan edilen hereket netijesinde bilegindäki çanak süňkünden şikes alypdy. Şondan soň oýunçy eli daňyly oýny dowam etdi, hatda bir goluň pasyny (Sautgeýte) hem beripdi. Angliýanyň ýygyndysy şol duşuşykda 2:1 hasaby bilen ýeňiş gazanypdy.
Şikesden soň Bekhem ilkinji operasiýasyny şol ýyl geçirtdi. Emma soňky rentgen barlaglary onuň eliň öň tarapynda 2002-nji ýylda goýlan metal nurbatyň wagtynda ornaşmandygyny görkezdi. Netijede, lukmanlar täzeden hirurgiki operasiýa geçirmegi gerekli hasapladylar.
Bekhemiň aýaly Wiktoriýa Bekhem sosial ulgamlarda onuň hassahanada düşekde ýatan, eli daňyly suratyny paýlaşdy.
50 ýaşyndaky Dewid Bekhem Angliýanyň milli ýygyndysynda 115 duşuşyga gatnaşyp, 17 gol geçirdi. Ol “Mançester Ýunaýted”, “Real”, “Los-Anjeles Gelaksi”, “Milan” we “Pari Sen-Žermen” ýaly klublarda çykyş etdi. Häzirki wagtda ol “Inter Maýami” futbol klubunyň paýdarlarynyň biri bolup durýar.
Ýakynda Britaniýanyň patyşasy Karl III Dewid Bekhemi rysarlyga galdyrdy.
