Russiýanyň Ylymlar akademiýasynyň Ulgam programmirleme instituty emeli aňyň kömegi bilen döredilen mazmuny awtomatiki bilgilemäge ukyply ulgamy döretdi diýip, RIA Nowosti habar berýär. Tehnologiýa, adamlar üçin görünmeýän, ýöne kompýuterler tarapyndan aňsat tanalýan sanly bellikleri ulanýar.
Bellik faýla ýerleşdirilýär we gysylandan ýa-da redaktirlenenden soň hem saklanýar. Bu wideonyň, sesiň ýa-da şekiliň gelip çykyşyny derrew kesgitlemäge mümkinçilik berýär. Işläp düzüjileriň sözlerine görä, ulgam hakyky materiallardan tapawutlandyrmak kyn bolan dipfeýkleriň ýaýramagy meselesini çözmek üçin döredildi.
Şol bir wagtyň özünde, Döwlet Dumasy galp mazmuny petiklemegi göz öňünde tutýan kanun taslamasyny taýýarlaýar. Deputat Andreý Swinsow galp materiallary ulanmak arkaly töhmet atmak we gorkuzyp talamak ýagdaýlarynyň köpelmegi bilen bagly gyssagly çäreleri görmegiň zerurdygyny aýtdy.
Muňa ugurdaşlykda ýurtda hususy başlangyçlar (startaplar) ösýär: MTS AI kompaniýasy 99% takyklygy bilen galplary tanamaga ukyply hyzmaty hödürledi. Ol wideony, sesi we şekilleri hakyky wagtda işe päsgel bermezden derňeýär.
Kezzaplary ýüze çykarmak üçin kiberhowpsuzlygyň hünärmenlerini bu işe çekmegi meýilleşdirýärler. Işläp düzüjileriň berýän maglumatyna görä, Russiýada dipfeýkleri döretmek üçin eýýäm 50 müňden gowrak programma bar.
AI-ni düzgünleşdirmek boýunça çäreler halkara tendensiýalaryna laýyk gelýär. Hytaýda hökmany bellik 2025-nji ýylyň sentýabr aýynda güýje girer we şuňa meňzeş başlangyçlar ABŞ-da işjeň ara alnyp maslahatlaşylýar.
Bilermenler feýklere garşy göreşmek bilen AI-ni kanuny ulanmagy goldamagyň arasynda deňagramlylygy tapmagyň zerurdygyny bellediler.
