Çiliniň Wera Rubin adyndaky obserwatoriýasyndaky dünýäniň iň uly teleskopy gijeki asmanyň ilkinji suratlaryny ýaýratdy. Serro-Paçon dagynyň El-Penýon gerşinden alnan suratlar görlüp-eşidilmedik gerimdäki millionlarça ýyldyzlaryň we galaktikalaryň ýagtylygyny görkezýär.
Obserwatoriýa ABŞ-nyň goldawy bilen 10 ýyldan gowrak wagtyň dowamynda guruldy. Teleskop üstümizdäki ýylyň ýazynda işläp başlady.
"Onuň şeýle bir giň syn ediş meýdany bar we kadrlary şeýle bir çalt çalyşýar, göýä, gijeki asmana seredip filme tomaşa edýän ýaly" – diýip, obserwatoriýanyň ylmy işgäri doktor Sandrin Tomas belledi.
Neşir edilen suratlaryň birinde Akmaýanyň ýolunda ýerleşýän Üçaýry we Laguna ýyldyzlar toplumlary görünýär.
Teleskopyň işiniň ilkinji ylmy netijeleriniň arasynda 2104 asteroidiň, şol sanda Ýere ýakyn ýedi asteroidiň tapylmagyny bellemek bolar. Bu obýektler öň Gün ulgamynda bellige alynmandyr. Alymlaryň bellemegine görä, olaryň hiç biri-de Ýere howp salmaýar. CNN bu asteroidleriň şekilleriniň soň çap ediljekdigini takyklaýar.
