Türkmenistanyň ýokary okuw mekdepleriniň 14-si «THE Impact Rankings-2025» atly her ýyl çap edilýän täsir etmegiň ählumumy reýtinginiň ýedinji neşirinde orun aldy. Bu ýokary okuw mekdepleri «Times Higher Education (THE)» Britan guramasynyň garaşsyz halkara bilermenleriniň ykrarnamasyna eýe boldular.
Türkmenistanyň aşakdaky ýokary okuw mekdepleri ýokary durnukly ösüş görkezijilerini görkezdiler:
- Halkara ynsanperwer ylymlary we ösüş uniwersiteti,
- Türkmenistanyň Oguz han adyndaky Inžener-tehnologiýalar uniwersiteti,
- Türkmenistanyň Döwlet energetika instituty,
- Türkmenistanyň Telekommunikasiýalar we informatika instituty,
- Türkmen oba hojalyk instituty,
- Türkmen döwlet binagärlik-gurluşyk instituty,
- Türkmen döwlet ykdysadyýet we dolandyryş instituty,
- Ý.Kakaýew adyndaky Halkara nebit we gaz uniwersiteti,
- Türkmen döwlet maliýe instituty,
- S.A.Nyýazow adyndaky Türkmen oba hojalyk uniwersiteti,
- Seýitnazar Seýdi adyndaky Türkmen döwlet mugallymçylyk instituty,
- Myrat Garryýew adyndaky Türkmenistanyň Döwlet lukmançylyk uniwersiteti,
- Magtymguly adyndaky Türkmen döwlet uniwersiteti,
- Döwletmämmet Azady adyndaky Türkmen milli dünýä dilleri instituty.
«THE Impact Rankings» reýtingi 2019-njy ýyldan bäri geçirilýär hem-de netijeliligiň esasy ählumumy sanawy bolup durýar. Şonda uniwersitetlere Birleşen Milletler Guramasy tarapyndan kesgitlenilen we durmuş-ykdysady ösüş derejesini ýokarlandyrmaga gönükdirilen 17 Durnukly ösüş maksatlarynyň (DÖM) gazanylmagy boýunça baha berilýär.
Täsir etmegiň ählumumy reýtingi ählumumy durnukly ösüşe ýardam etmekde hemmetaraplaýyn artyklygyny görkezýän uniwersitetleri kesgitleýär we belleýär. Dürli DÖM-lerde üstünlik gazanyp, uniwersitetler ykdysady durnuklylyk, köptaraply durmuş, ykdysady ösüş we DÖM-i gazanmakda netijeli hyzmatdaşlyk bilen birlikde, dünýäniň wajyp meselelerini çözmäge ygrarlydyklaryny görkezýärler.
«THE Impact Rankings-2025»-e girizilen türkmen ýokary okuw mekdepleri 17 DÖM-iň ählisini diýen ýaly gazanmaga işjeň we anyk hereketli gatnaşýandyklaryny görkezdiler. Şolaryň hatarynda «Bilimiň hili», «Elýeterli we arassa energiýa», «Senagat, innowasiýalar we infrastruktura», «Gender deňligi», «Gury ýerleriň ekoulgamyny goramak», «Saglyk we abadançylyk», «Arassa suw we arassaçylyk», «Mynasyp iş we ykdysady ösüş», «Durnukly şäherler we ilatly ýerler», «Maksatlary gazanmak üçin hyzmatdaşlyk» baradaky maksatlar we beýlekiler bar.
Şu ýyl dünýä reýtinginde BMG-niň DÖM-iň gazanylmagynda ýeten ösüşleri esasynda 130 ýurtdan we çäklerden uniwersitetleriň 2526-sy görkezildi.
