ABŞ-nyň Aýdaho ştatynyň ýaşaýjysy Rob Greýner Neuralink kompaniýasynyň neýroçibi oturdylan altynjy meýletinçi boldy. 2022-nji ýylyň dekabryndaky awtoulag heläkçiliginden soň ysmaz bolan erkek adam indi ekrandaky kursory elleriniň kömegi bolmazdan, diňe pikir güýji arkaly dolandyryp bilýär.
Neýroimplant Greýnere 2025-nji ýylyň 14-nji iýunynda oturdyldy. Operasiýa üstünlikli geçdi we bary-ýogy bir hepde soň onuň kompýutere elini degirmän, diňe pikiri arkaly wideooýunlaryny oýnaýandygyny görkezýän wideoýazgy peýda boldy. Wideoda Greýneriň noutbugyň öňünde oturandygy we diňe pikiriniň kömegi bilen kursory ekranda hereket etdirýändigi aýdyň görünýär.
«Neuralink bilen diňe bir hepdede nämeleri etmegi başarandygym haýran galdyryjy!» — diýip, ol X sosial torunda ýazdy. Greýner hiç hili goşmaça kömekçi tehnologiýany, şol sanda göz yzarlaýjy ulgamlary hem ulanmaýandygyny, diňe çipden we noutbukdan peýdalanýandygyny belledi.
Neuralink tehnologiýasy beýniniň elektrik impulslaryny daşarky enjamlar üçin buýruklara öwürýär. Ilon Maskyň kompaniýasy tarapyndan işlenip düzülen interfeýs daşyndan görünmeýär we kompýuteri ýa-da smartfony dolandyrmaga mümkinçilik berýär.
Synaglaryň ilkinji gatnaşyjysy 2024-nji ýylyň ýanwarynda Arizona ştatyndan Noland Arbo boldy, ol hem ýol-ulag hadysasyndan ysmaz bolupdy. Häzir Arbo diňe bir kompýuteri dolandyrmagy däl, eýsem, okamagy, küşt oýnamagy we onlaýn oýunlarda bäsleşmegi hem başarýar.
Neuralink häzirki wagtda kwadriplegiýasy (el-aýagyň (dört synanyň) we göwräniň bölekleýin ýa-da doly işlemeýän agyr ýagdaýy) bolan meýletinçileri nobatdaky kliniki synaglara gatnaşmaga çagyrýar. Şeýle hem Ilon Mask geljek ýyl «Blindsight» atly çibiň synaglaryna başlajakdyklaryny habar berdi – bu tehnologiýa bütinleý kör adamlaryň görüş ukybyny gaýtadan dikeltmäge mümkinçilik berer.
