Hytaý magnit lewitasiýaly otlynyň (maglew) prototipiniň tizligini bary-ýogy ýedi sekuntda sagatda 650 kilometre ýetirdi. Bu üstünlik Hubeý prowinsiýasynda gurlan täze 1000 metrlik ýokary tizlikli synag ýolunda gazanyldy diýip, «CGTN» habar berýär.
Adaty ýokary tizlikli synaglardan tapawutlylykda, adatça 30-40 kilometr aralygy talap edýän uzyn synag ýollarynyň ýerine, täze synag ýolunda gysga aralykda tizlendiriş usuly ulanyldy. Munuň üçin tizlik bilen ýerleşişi örän takyk ölçemek zerur boldy.
Sagatda 650 kilometr tizlik bu synag ýolunyň iň ýokary çägi däl: hünärmenler prototipiň iş tizligini sagatda 800 kilometre ýetirmegi meýilleşdirýärler.
