Starlink hemra interneti 2025-nji ýylyň üçünji çärýeginde Gazagystanyň ähli ýerinde işläp başlar. Bu barada Respublikanyň sanly ösüş ministri Žaslan Madiýew habar berdi.
Hyzmat ähli ulanyjylar üçin elýeterli bolar, ýöne optiki-süýümli aragatnaşygyň bolmadyk uzakdaky ilat nokatlarynyň ýaşaýjylary ilkinjileriň hatarynda göz öňünde tutular. Ministr Starlink-e birikmegiň we hyzmatlaryň bahasynyň adaty internetden ýokary boljakdygyny belledi. Häzir nyrhnamalary kesgitlemek, ýerüsti stansiýalar üçin meýdançalary saýlamak we hyzmaty işe girizmek bilen bagly tehniki meseleleri çözmek boýunça işler dowam edýär.
Sanlaşdyrmak maksatnamasynyň çäklerinde Gazagystanyň Sanly ösüş ministrligi oba ýerlerinde-de optiki-süýümli aragatnaşyk ulgamlaryny ösdürmegini dowam etdirýär.
Žaslan Madiýew ýurduň ähli raýatlary üçin aragatnaşyga durnukly elýeterliligi üpjün etmek üçin simli we hemra internetiniň ugurdaş ösdüriljekdigini belledi.
