Beýik Britaniýanyň “Fitch Ratings” agentligi Türkmenistanyň Döwlet daşary ykdysady iş bankyna “BB-durnukly” reýting derejesini kesgitledi. Bank tarapyndan halkara reýtingi almak boýunça geçirilen işler barada wise-premýer H.Geldimyradow Hökümet mejlisinde hasabat berdi.
Bellenilişi ýaly, şu ýylyň 16-njy iýunynda ýurdumyzyň bu bankyna “BB-durnukly” reýting derejesiniň kesgitlenendigi baradaky hoş habar gelip gowuşdy. Agentligiň maglumatyna laýyklykda, ýurdumyzyň maliýe durnuklylygynyň ýokary derejesi we uly möçberde ätiýaçlyk serişdeleriniň bardygy bellenilýär.
Şunuň bilen birlikde, Döwlet daşary ykdysady iş bankynyň maliýe-bank işjeňligi gowy bahalandyrylyp, tölege ukyplylygynyň ýokary derejesi beýan edilýär hem-de bu döwlet bankynyň maliýe serişdeleri boýunça ýurdumyzyň iri banklarynyň biridigi bellenilýär.
Serdar Berdimuhamedow wise-premýere ýurdumyzyň daşary ykdysady işini has-da ösdürmek boýunça alnyp barylýan işleri mundan beýläk-de dowam etmegi tabşyrdy.
