Intel iýul aýynda Intel Foundry önümçilik bölüminde işleýän işgärleriniň 15% - 20%-ni işden çykarmagy meýilleşdirýär, käbir çaklamalara görä, bu 10 müňden gowrak adam bolup biler. Bu baradaky maglumat önümçiligiň wise-prezidenti Nagi Çandrasekaranyň adyndan täze içerki korporatiw ýaýradylan hatda berilýär diýip, OregonLive habar berýär.
Intel ozal işgärleri azaltmak meýilnamasyny yglan edipdi, emma işden çykaryljaklaryň sany indi belli boldy. Geçen ýylyň ahyrynda kompaniýanyň 109 müň işgäri bardy. Olaryň näçesiniň önümçilikde işleýändigi barada takyk maglumat aýdylmaýar.
Intel-iň iň uly önümçilik bölümlerinden biri Oregonda ýerleşýär. Bu ýerde, takmynan, 20 000 adam işleýär we işden çykaryljakdygy baradaky habar işgärleriň arasynda alada döretdi. Geçen ýyl umumy ştatdan 15 000 adamyň azaldylmagy sebäpli Oregonda 3000 töweregi adam işsiz galdy.
2024-nji ýylda kompaniýa uly öweztöleg tölejekdigini aýdyp, meýletin işden çykmagy teklip edipdi. Bu ýyl işçileriň işde zerurlygy we hünär derejesi ileri tutuljak. Intel işden çykarylýan hünärmenleriň bolmaly derejede aladasyny etmegi wada berýär.
Geçen ýyl Intel-e Oregonda, Arizonada, Nýu-Meksikoda we Ogaýoda zawodlaryny gurmak üçin “Çipler hakyndaky kanun” boýunça 7,9 milliard dollar federal kömek beriljekdigi wada edilipdi. Kompaniýa diňe 1 milliard dollar almaga ýetişdi. Galan taslamalaryň durmuşa geçiriljegi-geçirilmejegi Ak tamyň administrasiýasynyň üýtgemegi bilen gümana bolup galdy.
