Intel kompaniýasy Şon Hany «Foundry Services» bölümçesiniň uly wise-prezidenti we baş direktory wezipesine belledi. Şon Han ozal 30 ýyla golaý wagtlap Samsung-da işläp, «Samsung Semiconductor» bölümçesiniň uly wise-prezidenti wezipesini eýeläpdi.
Mälim edilmegine görä, ol maý aýynda Intel-e goşular we tehnologiýalary işläp düzmek hem-de önümçilik boýunça ýerine ýetiriji wise-prezident Naga Çandrasekarana göni tabynlykda işlär.
«Şon özüniň Samsung-da geçen otuz ýyllyk iş tejribesi bilen ýarymgeçirijiler pudagynda toplan gymmatly ukyplaryny biziň toparymyza getirer» diýip, Naga Çandrasekaran belledi.
Kompaniýa täze ýolbaşçynyň tejribesiniň tehnologik amallary ösdürmäge we önümçilik mümkinçiliklerini giňeltmäge ýardam etjekdigine ynanýar.
