BMW tebigy süýümden ýasalan elementlere eýe bolan M4 GT4 modelini hödürledi. Ulag 19-22-nji iýunda “24 sagat Nýurburgring” ýaryşyna gatnaşar. Bu awtomobil kompaniýanyň durnukly tehnologiýalary köpçülikleýin önümçilige ornaşdyrmakda ilkinji ädimi boldy.
Tebigy süýümden komponentler Şweýsariýanyň Bcomp kompaniýasy bilen bilelikde döredildi. Adaty uglerod matasyndan (karbon) tapawutlylykda, täze material zygyr ýaly gaýtadan dikeldilýän çeşmelerden öndürilýär. Bu hem önümçilik tapgyrynda CO2 zyňyndylaryny 40%-e çenli azaltmaga we bölekleri gaýtadan işlemegi aňsatlaşdyrmaga mümkinçilik berýär.
BMW bu tehnologiýany 2019-njy ýyldan başlap awtosportda, şol sanda “Formula E-de”, M4 DTM we GT4 ýaryş ulaglarynda ulanyp başlady. Indi ösümlik esasly komponentler senagat şahadatnamasyny aldy we BMW M köpçülikleýin modellerinde ulanylar.
Şeýle çemeleşme diňe bir awomobiliň agramyny azaltman, eýsem önümçiligi ekologiýa taýdan has arassa etmäge ýardam berýär – bu 2025-nji ýylyň täze awtomobilleri üçin möhüm ölçegdir.
