ABŞ ysmaz adamlara pikiriň güýji bilen kompýuteri dolandyrmaga mümkinçilik berýän beýni implantlaryny işläp taýýarlamak bilen meşgullanýan ýeke-täk ýurt däl. Bu ugurda Ilon Maskyň Neuralink startapy öňdebaryjy hasaplanýar, ýöne ýakynda Hytaý hem öz neýroimplantynyň kliniki synaglaryny üstünlikli tamamlady.
Bloomberg agentliginiň Global Times-e salgylanyp habar bermegine görä, Hytaý bu ugurda hakyky netijeleri gazanmagy başaran dünýäde ikinji ýurt boldy. Şu ýylyň mart aýynda el-aýagy ysmaz bolan hassa kelle beýnisine implant oturtmak boýunça operasiýa geçirdi. Häzirki wagta çenli ol kompýuter oýunlarynda, şol sanda ýaryş we küşt oýunlarynda syçanjygyň görkezijisini dolandyrmagy özleşdirdi. Operasiýa beýnini öwrenmäge ýöriteleşen Şanhaý ylmy gözleg merkezinde geçirildi.
Hytaý çeşmeleri ýurtda döredilen implantyň dünýäde iň ykjam implantdygyny belleýär – onuň diametri 26 mm, korpusynyň galyňlygy 6 mm barabar. Hünärmenleriň baha bermegine görä, gurluş Neuralink bilen deňeşdirilende 100 esse ýokary çeýeligi üpjün edýär.
Geljekde alymlar hassa pikiriň güýji bilen robotizirlenen eli dolandyrmagy, mysal üçin, predmetleri tutmagy we suwly bulgury saklamagy öwretmegi meýilleşdirýär. Eger ähli zat üstünlikli bolsa, beýni implanty Hytaýyň düzgünleşdiriji edaralaryndan ygtyýarnama alyp, 2028-nji ýylda bazara çykyp biler.
