15-nji iýunda Stampi atly alabeder guýrukly lemur 39 ýaşyny belledi we resmi taýdan erkinlikde ýaşamaýan iň garry lemur diýlip ykrar edildi. Ol Ginnesiň rekordlar kitabyna girdi.
Stampi 1986-njy ýylda Surreý graflygynda (Beýik Britaniýa) dünýä indi, soňra Şotlandiýa getirildi. 2005-nji ýyldan bäri ol öz ogullary – 21 ýaşly Red we 20 ýaşly Julian bilen bilelikde “Bäş uýa” haýwanat bagynda ýaşaýar. Bu hem olar üçin uly ýaşdyr.
Erkinlikde ýaşamaýan alabeder guýrukly lemurlaryň ortaça ömür dowamlylygy 20-25 ýyl, ýabany tebigatda bolsa 20 ýyldan hem azdyr. Ýaşyna garamazdan, Stampiniň ýagdaýy gowy, ýöne onuň görşi peseldi we bogunlarynda ýaş bilen baglanyşykly üýtgeşmeler peýda boldy. Her näme diýseňem, garrylyk özüni görkezýär. Oňa her gün artrite garşy derman berilýär.
Haýwanat bagynyň işgärleriniň aýtmagyna görä, Stampi Güne ýanmagy, ter ot, aýratynam, söwüt hem-de batat iýmegi gowy görýär.
Ýokarda agzalan ikisinden başga-da, Stampiniň 9 çagasy, 25 agtygy, alty çowlugy we bir ýuwlugy bar. Alty çowlugynyň ählisi Gresiýadaky haýwanat bagynda ýaşaýar.
