Netflix “Kalmar oýny” serialynyň üçünji möwsüminiň soňky treýlerini hödürledi. Täze bölümleriň premýerasy 27-nji iýunda bolar.
Wideoda baş gahryman Gi-Hun öňki oýunlary ýadyna salyp, dostlarynyň ölüminde we öz ýalňyşlyklarynda özüni günäkär hasaplaýar.
“Sen bu oýunlarda erbetligiň öňüni alyp bilmersiň. Ýöne men seniň bizi halas etmek üçin şu ýerdedigiňe ynanýaryn” – diýmek bilen, Kym-ja oňa öz maksadyny ýatladýar.
Şeýle-de, treýlerde VIP-adamlar, liftde goragçylaryň howply tutluşygyndan sahna we ahyrky kadrlar görkezilýär: Gi-hun smokingde Frontmen bilen agşamlyk naharyna taýýarlanýar, näbelli gatnaşyjy bolsa soňky “Kalmar oýnundan” öň bagjygyny daňýar.
“Kalmar oýny” Netflix-iň taryhynda iň meşhur serial bolmagynda galýar. Ikinji möwsüm umumy tomaşa reýtinginde dördünji orny eýeleýär.
Serialyň prodýuseri birinji we ikinji möwsümleriň arasyndaky wakalar barada spin-off düşürmek mümkinçiligini gözden geçirýändigini aýtdy. Mundan başga-da, režissýor Dewid Finçer serialyň amerikan wersiýasynyň üstünde işleýär.
