Siriýanyň Idlib welaýatynyň Maarret-en-Nuuman şäherinde ýykylan jaýyň harabalygy arassalanýan wagtynda Wizantiýa döwründen galan mazarlar toplumy tapyldy. Onuň ýaşy, takmynan, 1500 ýyl diýip, Sky News habar berýär.
Potratçy daşyň açylan ýerlerini gördi, şondan soň ýerli ilat bu açyş barada hökümete habar berdi. Ol ýere gadymy ýadygärligi öwrenmek we goramak üçin hünärmenler iberildi.
Bu Wizantiýa döwründäki ýerasty mazarlykdyr diýip çaklanylýar. Munuň şeýledigine sütünleriň birine oýulyp çekilen haç, şeýle hem tapylan keramiki we aýna artefaktlary şaýatlyk edýär.
Wizantiýa imperiýasy biziň eýýamymyzyň IV asyrynda döräp, Rim imperiýasynyň mirasdüşeri hasaplanypdyr. Döwletiň paýtagty Konstantinopol (häzirki Stambul, Türkiye) bolupdyr. Wizantiýa resmi taýdan hristian dinine uýupdyr.
