Repçi Snup Dogg özi baradaky filmiň surata düşüriş işlerine gatnaşar. Bu filmde onuň dünýä meşhurlygyna alyp baran ýoly we aýdym-saz pudagyndaky ilkinji ädimleri barada gürrüň berler diýip, Deadline neşiri habar berýär.
Repçiniň keşbini «Outer Banks» serialynyň ýyldyzy Jonatan Dewiss ýerine ýetirer.
Taslamanyň režissýorlygyna «Coming 2 America» filminiň režissýory Kreýg Brýuer bellendi, senarisini bolsa «American Crime Story» serialynda işlän Jo Robert Koul ýazdy. Snup Doggyň özi bolsa filmiň prodýuserleriniň biri bolar. Ol bu işi «A Beautiful Mind» filmi bilen «Oskar» baýragyny alan Braýan Greýzer bilen bilelikde alyp barar.
Taslama Universal bilen hyzmatdaşlykda amala aşyrylar we ýerine ýetirijiniň karýerasyna badalga beren Death Row atly leýbliň ösüşiniň täze tapgyrynyň bir bölegi bolar. Bu leýbl diňe bir saz bilen çäklenmän, başga ugurlarda hem işini giňeltmegi meýilleşdirýär.
Universal-yň hip-hop temaly filmler boýunça öňden gelýän uly tejribesi bar: studiýa ozal «Straight Outta Compton» we «8 Mile» ýaly meşhur filmleri çykarypdy.
