“Balerina” filmi – “Jon Uigiň” ilkinji doly metražly spin-off-y amerikan prokatyna 25 mln dollar bilen başlady. Deadline neşiriniň habar bermegine görä, premýeradan öň film azyndan 35 mln dollar ýygnar diýlip garaşylypdy.
Bu franşizada ikinji iň pes görkezijidir: ondan az ýygymy 2014-nji ýylda 14,4 mln dollar bilen prokata başlan ilkinji film görkezipdi. Ýöne bu filmiň býujeti 20 mln dollardan sähel köpdi, “Balerina” üçin bolsa filmi döredijiler, takmynan, 90 mln dollar sarp etdi. Çykdajylaryň uly bölegi gaýtadan düşürmek bilen baglanyşyklydy.
Aslynda, režissýor Len Uaýzman filmi 2023-nji ýylyň fewralynda düşürip tamamlady, ýöne Lionsgate studiýasy ahyrky netijeden kanagatlanmady. Prodýuserler oňyn däl synlaryň öňüni almak isledi, çünki ol tutuş franşiza täsir edip biljekdi. Şonuň üçin filmiň hilini ýokarlandyrmak kararyna gelindi. Munuň üstünde franşizanyň asyl filmleriniň prodýuseri we režissýory Çad Stahelski işledi. Netijede, ol Uaýzman gatnaşmazdan ähli ekşn-sahnalary we filmiň esli bölegini gaýtadan düşürdi. Tankytçylaryň we tomaşaçylaryň ýokary bahalaryny göz öňünde tutsaň, netije oňyn boldy.
ABŞ-dan daşary hem film 26 mln dollar ýygnady. Umumy kassa ýygymy 51 mln dollara ýetdi.
Hasaplamalara görä, “Balerina” 80-90 mln dollar ýygnap biler. Film sanly platformalarda çykandan soň, çykdajylary ödese gerek. Ýöne awtorlar üçin esasy zat – franşiza zyýan çekmedi. Bu häzirki wagtda “Jon Uik” boýunça diňe bir bäşinji bölümiň däl, eýsem Keýn barada spin-off-uň taýýarlanýandygyny göz öňünde tutsaň, örän möhümdir. Soňkusynda esasy keşbi Donni Ýen ýerine ýetirer – ol režissýor hökmünde hem çykyş eder. Munuň bilen birlikde “Jon Uigiň” animasion prikweline garaşylýar – onda Kianu Riwz gahrymana ses berer, režissýor Şennon Tindl bolar.
