Microsoft korporasiýasy Windows 11-de täze energiýa tygşytlaýyş funksiýasyny synag edýär. Bu funksiýa ulanyjy kompýuter bilen aragatnaşyga girmedik wagtynda prosessoryň öndürijiligini awtomatik ýagdaýda peselder. «User Interaction-Aware CPU Power Management» atly gural häzirki wagtda operasion ulgamyň beta wersiýasynda barlanýar.
Eger-de Windows kursoryň hereketini, klawişlere basylmagy ýa-da beýleki hereketleri anyklamasa, enjamy işjeň däl diýip hasaplar we energiýa tygşytlaýyş ýagdaýyny işjeňleşdirer. Bu ýagdaýda prosessoryň güýji dolandyryş (PPM) sazlamalary enjamyň öndürijisi tarapyndan kesgitlenýän görnüşde ulanylar. Prosessor pes ýygylyga we naprýaženiýä geçýär ýa-da uky režimine meňzeş ýagdaýa girýär.
Ulanyjyň işjeňligi täzeden başlanda, Windows ulgamy adaty ýagdaýa gaýtaryp getirýär. Microsoft-yň aýtmagyna görä, bu ýagdaýlar arasyndaky geçişler ulanyjy üçin göze ilmez ýaly bolar.
Ulgam käbir aýratyn ýagdaýlary hem göz öňünde tutar, meselem, wideo görkezilýän mahaly prosessor haýallamaz. Beýleki kadadan çykmalar barada häzirlikçe maglumat berilmedi.
Bu funksiýa Windows 11 24H2 we 25H2 wersiýalaryna degişli 26200.5603 belgili ýygyndyda synag edilýär. Şeýle-de Copilot atly emeli aň kömekçisiniň esasynda täze funksiýanyň işe girizilmegine garaşylýar. Ol akkumulýatoryň ýagdaýyny yzarlap, iş möhletini uzaltmak üçin sazlamalary üýtgetmegi teklip eder.
