Şwesiýanyň kazyýeti üç çagasynyň dişine dogry seretmändigi üçin ene-atany sekiz aý azatlykdan mahrum etdi. Bu barada Aftonbladet gazeti habar berdi.
Boros şäherinde işleýän diş lukmany öz kabul edişligine gelen çagalaryň dişini görenden soň degişli edaralara ýazan arzasy derňew işlerine başlanmagyna sebäp boldy. Lukman üç çaganyň hem dişinde kariesiň giňden ýaýrandygyny aýtdy. Çagalaryň dişleriniň ýagdaýy juda erbet bolansoň, olaryň birnäçesini sogurmaly bolupdyr.
Barlagdan geçirip, bejergi berenden soň diş lukmany bu ýagdaýy ygtyýarly edaralara habar berdi. Polisiýa derňew işine başlady.
Iş kazyýete baryp ýetdi. Är-aýal öz günäsini boýun almady, ýöne barybir kazyýet olary günäli bildi we hersini sekiz aý azatlykdan mahrum etdi.
Kazyýet işiniň jikme-jiklikleri, şol sanda çagalaryň ýaşy we goşmaça ýagdaýlar takyklanmady.
