Türkmenistanyň wekiliýeti 5-nji iýunda Ženewada Halkara Zähmet Maslahatynyň 113-nji mejlisiniň çäklerinde Halkara Iş berijiler Guramasynyň (IOE) we Halkara Kärdeşler Arkalaşyklarynyň Konfederasiýasynyň (ITUC) wekilleri bilen birnäçe ikitaraplaýyn duşuşyklary geçirdi. Bu barada Türkmenistanyň Ženewada ýerleşýän BMG-niň ýakyndaky Hemişelik wekilhanasy habar berýär.
Türkmenistanyň Zähmet we ilaty durmuş taýdan goramak ministri Muhammetseýit Sylapow Halkara Iş berijiler Guramasynyň Baş sekretary Roberto Suares-Santos bilen hyzmatdaşlygyň giňeldilmegini, tehniki goldaw we milli iş berijileriň halkara başlangyçlaryna gatnaşmagyny ara alyp maslahatlaşdy.
Halkara Kärdeşler Arkalaşyklarynyň Konfederasiýasynyň ýolbaşçysy Lýuk Triangl bilen geçirilen duşuşykda döwlet, iş berijiler we kärdeşler arkalaşyklarynyň arasynda üçtaraplaýyn hyzmatdaşlygyň ösdürilmegine aýratyn üns berildi. Türkmenistanyň kärdeşler arkalaşyklarynyň ITUC-nyň düzümine girmeginiň mümkinçilikleri we olaryň ýurduň durmuş syýasatynyň kemala getirilmegindäki orny ara alnyp maslahatlaşyldy.
4-nji iýunda maslahatynyň umumy mejlisinde eden çykyşynda Muhammetseýit Sylapow Türkmenistanyň mynasyp zähmet, durmuş adalaty we hyzmatdaşlyk ýörelgelerine ygrarlydygyny belläp geçdi. Ministr Halkara zähmet guramasynyň global gün tertibiniň ähmiýetini nygtap, onuň ugurlarynyň Türkmenistanyň 2052-nji ýyla çenli ykdysady we durmuş taýdan ösüş maksatnamasy bilen sazlaşýandygyny belläp geçdi.
