NASA 2024 YR4 asteroidiniň traýektoriýasyna gaýtadan seredip, onuň Aýa gaçmak ähtimallygyny ýokarlandyrdy.
Geçen ýylyň ahyrynda ýüze çykarylan 2024 YR4 asteroidi ilkibaşda asteroid howpuna gözegçilik etmegiň taryhynda Ýer üçin iň çynlakaý howp diýlip ykrar edildi. Oňa Ýerden uzaklaşýan traýektoriýada syn edildi, şonuň üçin jisim we onuň orbitasy baradaky ilkinji maglumatlar doly däldi.
Soňra alymlar has köp maglumat alyp, asteroidiň ýoluny anyklady. Alymlar Ýer üçin howpuň ýokdugyny kesgitledi, ýöne onuň Aý bilen çaknyşyp biljekdigi belli boldy. 2025-nji ýylyň maý aýynda NASA “Jeýms Uebb” teleskopynyň kömegi bilen 2024 YR4 asteroidine soňky gezek gözegçilik etdi, şondan soň asteroid gözden ýitdi.
Täze maglumatlar onuň Günüň töweregindäki orbitasyny 20% takyk hasaplamaga mümkinçilik berdi. Asteroid 2032-nji ýylyň 22-nji dekabrynda Ýere we Aýa golaýlaşar. Ozal onuň Aýa gaçmak ähtimallygy 3,8%-di, häzir ol 4,8%-e çenli ýokarlandy.
2024 YR4 asteroidiniň diametri 70 metrden geçmeýär. Onuň gaçmagy Aýyň orbitasyna täsir etmez we Ýer üçin howp salmaz. Ýöne şeýle waka Aýy seýsmiki tolkunlaryň kömegi bilen öwrenmäge mümkinçilik berip biler. Eger çaknyşma ähtimallygy ýokary bolup galsa, Aýa seýsmiki datçikleri bolan stansiýa iberilip bilner.
Asteroidiň indiki gezek Ýere 2028-nji ýylda golaý gelmegine garaşylýar.
