«OpenAI» kompaniýasy ChatGPT üçin täze mümkinçilikleri goşdy. Indi işewür ulanyjylar çat-boty Google Drive, Dropbox, Box, SharePoint we OneDrive ýaly korporatiw bulut saklaýjylarynda ýerleşýän kompaniýanyň içerki maglumatlaryna baglap bilerler. Emeli aň kompaniýalaryň içerki resminamalarynda maglumat gözläp, seljerip bilýär diýip, «TechCrunch» habar berýär.
Mundan başga-da, çat-bot ýygnaklary hasaba alyp we göni ýaýlymda berip bilýär, taýmkodlar bilen bellikler döredýär, esasy pursatlary saýlap görkezýär we ara alnyp maslahatlaşylan zatlaryň esasynda mümkin hereketleri teklip edýär. Bu ýazgylary adaty resminamalar ýaly gözläp bolýar. Olardan döredilen wezipeleri awtomatik usulda «OpenAI-yň» tekst we kod bilen işlemek üçin niýetlenen Canvas gurallaryna geçirip bolýar.
Bu funksiýa faýllaryň elýeterlilik hukuklaryny hem hasaba alýar: eger işgär haýsydyr bir faýla girip bilmeýän bolsa, ChatGPT oňa degişli maglumatlary görkezmez.
Ulanyjylar şeýle hem maglumatlary çuňňur seljermek üçin niýetlenen MCP (Model Context Protocol) protokoly arkaly beýleki gurallary hem birikdirip bilerler. MCP goldawy Pro, Team we Enterprise nyrhnamalarynyň abunaçylary üçin elýeterlidir.
«OpenAI» kompaniýasy «HubSpot», «Linear» we birnäçe «Microsoft» hem-de «Google» önümleri üçin «deep research connectors» diýlip atlandyrylýan beta wersiýany işe girizdi. Bularyň kömegi bilen ChatGPT kompaniýanyň içerki maglumatlaryny internetden alnan daşarky maglumatlar bilen utgaşdyryp analitiki hasabatlar taýýarlap bilýär. Bu funksiýalaryň ählisi tölegli nyrhnamalarda elýeterlidir.
