Microsoft korporasiýasynyň esaslandyryjysy Bill Geýts öz baýlygynyň ep-esli bölegini Afrikadaky meseleleri çözmäge gönükdirjekdigini habar berdi. Bu barada Geýtsiň haýyr-sahawat gaznasynyň habarynda aýdylýar.
Forbes neşiri milliarderiň baýlygyny 116,5 mlrd dollar diýip hasaplaýar. Ol dünýäniň iň baý adamlarynyň reýtinginde 13-nji orny eýeleýär.
“Ýakynda men geljek 20 ýylda öz baýlygymy paýlamagy borç edindim. Bu serişdeleriň uly bölegi Afrikadaky meseleleri çözmekde kömek etmäge gönükdiriler” – diýip, Geýts Afrika birleşiginde eden çykyşynda aýtdy.
Gaznanyň beýanyna görä, onuň býujeti geljek 20 ýyl üçin 200 mlrd dollar bolar. Bu möhletden soň gurama öz işini tamamlar. Geýts öz baýlygynyň esasy bölegini hut gazna gönükdirmek isleýär.
Geýtsiň gaznasy Afrikada eýýäm köp ýyl bäri işleýär. Onuň Efiopiýada, GAR-da, Keniýada, Nigeriýada we Senegalda wekilhanalary bar.
Geýts Afrika ýurtlarynyň, saglygy goraýyş we bilim ulgamyny ösdürse, ösüş gazanyp biljekdigini belledi. Ol ilkinji lukmançylyk kömeginiň we göwreli aýallaryň hem ýaş çagalaryň ýaşaýyş şertlerini gowulandyrmagyň möhümdigini aýtdy.
Şeýle-de, ol yklymyň ýurtlarynyň esasy meseleleri çözmekde emeli aňdan peýdalanmak synanyşygy barada belläp, bu tagallalara oňyn baha berdi.
