Sisiliýada Etna wulkany atylyp başlandy. Bu barada Italiýanyň Milli geofizika we wulkanologiýa institutyna salgylanyp, ANSA agentligi habar berýär.
Wulkan atylmazdan öň krateriň bir bölegi opuryldy, bu hem piroklastik akymyna getirdi – bu gyzgyn gazlaryň, külüň we daşlaryň garyndysydyr. Wulkan birnäçe kilometre çenli howada tüsse, kül we daş zyňdy.
2-nji iýunda ýerli wagt bilen 13:00 töweregi lawa zyňylyp başlandy, hünärmenler muny 2014-nji ýyldan bäri iň güýçli atylma diýip atlandyrýar.
Wulkanyň atylmagy güýçli partlama bilen bolup geçdi. Ol 2-nji iýunda gije başlandy. Häkimiýetler ilat üçin howpuň ýokdugyny habar berdi, ýöne wulkana golaýlaşmazlygy maslahat berdi. Kataniýanyň howa menzili işlemegini dowam etdirýär, muňa garamazdan, awiasiýa üçin wulkan howpunyň ýokary derejesi saklanýar. Käbir gatnawlar Palermo gönükdirildi, ýöne howa menzili ýapylmady.
Hünärmenleriň aýtmagyna görä, wulkan sebitinde durnukly ýagdaý saklanýar. Golaýdaky uly şäher Kataniýany kül basmady. Şeýle-de bolsa, häkimiýetler ýeliň ugry üýtgän ýagdaýynda täze duýduryş bermäge taýýar.
Etna Ýewropada iň beýik hereket edýän wulkandyr. Ol yzygiderli işjeňlik görkezýär. Geçen ýylyň awgust aýynda wulkan hepdede iki gezek asmana kül zyňdy. Şu ýyl işjeňlik aprel aýynda hasaba alyndy.
Her ýyl Etna bir ýarym million töweregi syýahatçy barýar, olaryň köpüsi çür depesine diýen ýaly çykýar.
