Ýaponiýada 1-nji iýundan başlap, iş berijileri aşa yssy howa şertlerinde işgärleriniň howpsuzlygyny üpjün etmäge borçly edýän täze düzgünler güýje girdi. Bu barada «Bloomberg» agentligi habar berýär.
Täze düzgünlere görä, talaplary ýerine ýetirmeýän kompaniýalara 500 müň ýena (takmynan, 3475 dollara) çenli jerime salnar. Bu çäreler iş ýerlerinde ýylylyk urmasynyň artmagy bilen baglylykda girizildi.
Ýaponiýanyň Saglygy goraýyş ministrliginiň maglumatlaryna görä, 2024-nji ýylda aşa yssy howa sebäpli, 30 adam heläk bolupdyr, takmynan, 1200 adam bolsa şikes alypdyr. Esasan-da gurluşyk we önümçilik pudaklarynda işleýän işgärler howply ýagdaýda galypdyr.
Täze düzgünleriň girizilmegine 2024-nji ýylyň tomsunda ýüze çykan rekord derejedäki yssy howa sebäp boldy. Häkimiýetler işgärleri howa şertlerinden goramak üçin, kanunçylyk derejesinde çäre görmegi zerur hasapladylar.
Ýaponiýanyň käbir iri kompaniýalary goşmaça çäreleri eýýämden durmuşa geçirip başladylar. «Shimizu Corp.» gurluşyk kompaniýasy işgärleriň temperaturasyny gözegçilikde saklamak üçin sensorlardan peýdalanýandygyny we iş tertibini ýylylyk indeksine görä uýgunlaşdyrýandygyny habar berdi. Şeýle-de «Yamato Transport» kurýer hyzmaty hem işgärlerine 75 müň sany şemalladylýan gursakça paýlamagy hem-de ofislerde we ammarlarda 3000 sany WBGT datçigini ornaşdyrmagy meýilleşdirýändigini mälim etdi.
