3-nji iýuna geçilen gije Türkiýäniň Ortaýer deňzi kenarynda 5,8 bal ululykda ýertitreme bolup geçdi. Ýerasty sarsgynlar ýerli wagt bilen 02:17-de hasaba alyndy.
Associated Press ýertitremäniň merkeziniň Marmaris şypahana sebitiniň golaýynda bolandygyny habar berdi. Ýertitreme Rodos grek adasynda hem duýuldy.
Türkiýäniň içeri işler ministri Ali Ýerlikaýa 70 töweregi adamyň zyýan çekendigi barada habar berdi.
Türkiýäniň häkimiýetinde ýertitreme sebäpli düýpli weýran bolmalar barada maglumat häzirlikçe ýok.
Ýatlap geçsek, 2023-nji ýylyň fewral aýynda Türkiýäniň günorta-gündogarynda bolup geçen 7,7 we 7,6 bal ululykdaky iki ýertitremäniň netijesinde 50 müňden gowrak adam heläk boldy. Ýertitreme Siriýa-da täsir etdi we bu ýerde azyndan 8,5 müň adam onuň pidasy boldy.
