Ýere alawlama wagtynda Gün tarapyndan zyňylan rekord häsiýetli plazma bulutlary ýetdi. Bu barada RYA-nyň Kosmos gözlegleri institutynyň we Gün-Ýer fizika institutynyň Gün astronomiýasy barlaghanasyna salgylanyp, TASS habar berýär.
Çeşmä görä, 1-nji iýunda Aşgabat wagty bilen 10:30-da planetara gurşawynyň ähli parametrleriniň birden güýçli üýtgemegi hasaba alyndy. Hünärmenler dykyzlygyň we temperaturanyň örän ýokary derejesine syn etdi. Soňkusy, hemra görkezijilerine ynansaň, 2 mln gradusdan gowrak boldy. Aslynda, kadaly temperatura, adatça, 100 müň gradusa barabar.
“Şeýle derejeler gözegçiligiň taryhynda hiç haçan hasaba alynmadyk ýa-da taryhy iň ýokary derejä golaý bolup biler” – diýlip, habarda aýdylýar.
Şeýle-de, barlaghana plazma bulutlarynyň Ýere örän tiz – 30 sagatdan az wagtyň içinde ýetendigini habar berdi, bu bolsa alymlaryň çaklamalaryndan tas bir gün tizdir.
Alymlaryň aýtmagyna görä, bolup geçýän zatlary häzirlikçe düşündirmek kyn. Alnan maglumatlar öňki çaklamalara ters gelýär. Bilermenler Ýere bulutlaryň diňe kiçi we tiz böleginiň ýetendigini, esasy böleginiň bolsa gijräk gelip biljekdigini-de inkär etmeýär.
Bir gün öň, 31-nji maýda hünärmenler M8.2 derejeli Gün alawlamasyny hasaba aldy. Ol şu ýyl iň uly plazma zyňyndylary bilen bolup geçdi.
