31-nji maýda alty sany raýat astronawty Blue Origin kompaniýasynyň New Shepard gämisinde suborbital uçuşy amala aşyrdy. NS-32 missiýasy ýerli wagt bilen 8:39-da Tehasdaky Launch Site One kosmodromyndan uçdy.
Ekipaž 104 km belentlige ýetip, agramsyzlyk ýagdaýynda 3 minut töweregi boldy – bu Karman çyzygy diýlip atlandyrylýan halkara kosmos serhetidir.
Köp gezeklik tizleşdirijiden aýrylandan soň, kapsula ýokary galmagyny dowam etdirdi. 104 km belentlikde missiýa gatnaşyjylar Blue Origin-iň tapawutlandyryş nyşanlaryny aldy we Kosmos gözlegleri assosiasiýasynyň sanawyna girizildi.
Uçuşa gatnaşyjylaryň arasynda Kea Aerospace-iň baş direktory we kosmosda ilkinji täze zelandiýaly Mark Roket bardy. Ol ozal Rocket Lab kompaniýasyny ösdürmäge gatnaşdy. Panamadan aklawçy Haýme Aleman BMG-niň 193 ýurdunyň ählisinde, iki polýusda we kosmosda bolup gören ilkinji adam boldy.
Şeýle-de, uçuşa Ewereste we beýleki bäş belentlige çykan kanadaly Jessi Uilýams we 149 ýurda aýlanan amerikaly Pol Jeris gatnaşdy. Mundan başga-da, toparda radiolog Grethen Grin we mugallym Emi Medina Horhe bardy.
Uçuş 10 minut dowam etdi. Kapsula paraşýutlaryň we gysylan howa ulgamynyň kömegi bilen üstünlikli gondy.
Bu New Shepard-yň 2015-nji ýyldan bäri 30-njy we 2021-nji ýyldan bäri 12-nji ekipažly uçuşy boldy. Umuman alanyňda, Blue Origin kosmosa 64 adam iberdi.
