Apple indi iPhone-laryň daşky görnüşini ownuk üýtgeşmeler bilen däl-de, her ýyl has uly özgertmeler bilen täzeläp başlar. Bu barada komponent üpjünçilik zynjyryndaky çeşmelere salgylanyp, Digital Chat Station insaýderi habar berdi.
Täzelenmeler öňümizdäki güýzde çykmagyna garaşylýan iPhone 17 bilen başlar. Aýratyn üýtgeşmeler Pro modellerinde bolar. Olarda gönüburçly we arka paneliň tutuş inini diýen ýaly gurşap alýan täze kameraly modul peýda bolar. Obýektiwler öňküsi ýaly çepde bolar, ýöne çyrasy, mikrofony we LiDAR skaneri sag tarapa geçiriler.
Şeýle-de arka panel üçin iki reňkli dizaýn hem göz öňünde tutulýar. Gara optiki blok bilen kümüş reňkli korpus utgaşdyrylyp bilner, ýöne bu mesele boýunça entek gutarnykly karar kabul edilmedi.
2026-njy ýylda Apple kompaniýasy iPhone 18 bilen smartfonyň öň tarapyny üýtgetmegi maksat edinýär. Esasy täzelik ekranyň ýokarsyndaky kesimiň aýrylmagy bolar. «Face ID» datçigi ekranyň astynda ýerleşdiriler, öňdäki kamera bolsa çep burça geçiriler. Bu bolsa ekrany has «arassa» eder.
Iň uly üýtgeşmeler 2027-nji ýyla — ilkinji iPhone-laryň çykarylyşynyň 20 ýyllygyna gabat getirmek meýilleşdirilýär. iPhone 19 Pro doly çarçuwasyz ekrana eýe bolar. Enjam bir bitewi aýna monolit görnüşde taýýarlanar, öňdäki AMOLED ekran arkadaky aýna gapak bilen utgaşar. Selfi kamerasyny we «Face ID» datçigini hem öz içine alýan ähli datçikler ekranyň astynda ýerleşdiriler. Ýagny, ekranyň ölçegi korpusyň ölçegine deň bolar.
Şeýle-de möhüm täzelikleriň ýene biri bolsa, doly kremniýli batareýanyň peýda bolmagy bolar. Ol energiýanyň dykyzlygyny we akkumulýatoryň ömrüni artdyrar. Energiýanyň sarp edilişi bolsa «iOS 21» operasion ulgamyndaky emeli aň algoritmleri arkaly optimizasiýa ediler.
