«D3O» kompaniýasy dünýäde ilkinji gezek nenýuton materialyndan taýýarlanan podkladkaly motosikl şlemini işläp düzdi. Adaty ýagdaýda ol ýumşak bolýar, emma urgy wagtynda tiz wagtda gatap, goragy üpjün edýär. Täze önümiň 2027-nji ýylda satuwa çykarylmagyna garaşylýar diýip, «ITHome» habar berýär.
Podkladka 2022-nji ýylda hödürlenen «Amp» konsepsiýasyna esaslanýar. Tehnologiýa pes intensiwli urgulary siňdirmek üçin niýetlenendir. Içki gatlak ýumşak nenýuton materialyndan taýýarlanypdyr, onuň üstünde bolsa rahatlygy üpjün edýän podkladka ýerleşdirilen. Bu kombinasiýa hem goragy, hem-de rahatlygy üpjün edýär.
«D3O» kompaniýasy ozal şeýle materiallary harby enjamlar, sport goragy we senagat howpsuzlygy serişdeleri üçin ulanypdy. Emma motosikl şlemlerinde bu tehnologiýa ilkinji gezek ulanylýar.
Belläp geçsek, şlem öndürilinde adaty ulanylýan material penopolistiroldyr (EPS). Ol has ýeňil, arzan we öndürmesi aňsat. EPS gysylma arkaly urgulary gowy siňdirýär. «D3O-nyň» nenýuton materialynyň netijeliligi we bahasy boýunça artykmaçlyklary häzirlikçe aýdyň däl.
