Şu hepdede NASA tarapyndan potensial howply (howp salmak mümkinçiligi bar) diýlip kesgitlenen dört sany asteroid Ýeriň deňinden geçer diýip, Interesting Engineering portaly habar berýär.
Birinji asteroid — 2025 KT1 — 12,8 metr diametrli bolup, 26-njy maýda Ýeriň ýanyndan howpsuz aralykda geçdi. 27-nji maýda bolsa 25,3 metr ululygyndaky 2025 JP asteroidisi planetamyza takmynan 5,1 million kilometrlik aralykda geçdi.
Şu gün, 28-nji maýda, üç sany asteroid bir wagtda geçmegine garaşylýar:
— 2025 KW (29,7 metr),
— 2025 JR (79,5 metr),
— 2025 KU1 (20,2 metr).
Bu asteroidleriň ölçegleri köp gatly binalar bilen deňeşdirip bolar. Olar örän ýokary tizlikde hereket edýärler, emma potensial howply diýip kesgitlenendigine garamazdan, Ýere howp salmaýarlar.
NASA-nyň klassifikasiýasyna görä, Ýerden 7,4 million kilometre çenli (4,6 million mil) golaýlykdan geçýän asteroidler potensial howply hasaplanylýar. Agentlik her ýylda Ýere golaýlaşýan 3000-den gowrak asteroidleri hasaba alýar. Olaryň köpüsi atmosfera gireninde ýanyp ýok bolýar we Ýeriň ýüzüne ýetmeýär.
Bu asman jisimleriniň hemmesi takmynan 4,6 milliard ýyl ozal Gün ulgamynyň emele gelmegi netijesinde galan asteroid guşagynyň bir bölegidir.
NASA-nyň maglumatyna görä, indiki 100 ýylyň dowamynda uly asteroid bilen çaknyşmak howpy ýok diýip hasaplanýar.
