21-nji oktýabrda täze dogan Aý ýagty kometa bolan C/2025 A6 Lemmon-a syn etmek üçin örän gowy şertleri döreder – bu gün asman jisimi Ýere iň ýakyn aralykdan – takmynan, 89 million kilometrden geçer diýip, TASS habar berýär.
Rus astronomy Sergeý Ýazewiň aýtmagyna görä, Aý şuglasynyň bolmazlygy asman jisimine has gowy syn etmäge mümkinçilik berer.
“Aýyň bolmazlygy ýagtylygyň düşmek meselesini aradan aýrar, şonuň üçin açyk howada kometa syn etmek üçin şertler dolan Aýdakydan hem gowy bolar. Diňe ýönekeý teleskop ýa-da dürbi gerek” – diýip, alym aýtdy. Ol kometany 2025-nji ýylda iň ýagtysy diýip atlandyrdy.
Kometa 3-nji ýanwarda açyldy. Onuň orbitasy kometany oktýabrda we noýabrda Demirgazyk ýarym şaryň ähli ýerinde görmäge mümkinçilik berýär. Häzir onuň ýagtylygy eýýäm 5-nji ýyldyz ululygyna ýetdi, iň ýakyn aralyga gelýänçä bolsa, ol 3,8 ýyldyz ululygyna ýeter, bu hem jisimi has görünýän eder.
Hünärmenleriň aýtmagyna görä, kometany Aw itleri ýyldyzlar toplumynda gözlemeli. Oktýabryň ahyrynda ol ýagty Arktur ýyldyzynyň üstünden uçup geçer.
C/2025 A6 Lemmon-yň orbital döwri, takmynan, 1350 ýyl diýlip hasaplanýar. Bu soňky gezek kometanyň Güne we Ýere biziň eramyzyň VII asyrynda şeýle ýakyn gelendigini aňladýar, indiki gezek bolsa ol Ýeriň golaýyndan, takmynan, 3350-nji ýylda uçup geçer.
