BMW Hytaý bazary boýunça çaklamalaryna gaýtadan seretdi. Kompaniýa doly elektrik awtomobilleriň satuwy boýunça garaşýan görkezijilerini peseldip, içinden ýandyrylýan hereketlendirijili modeller boýunça çaklamasyny ýokarlandyrdy.
Şeýle çözgüt i3 we iX3 elektromobilleri bilen şowsuz tejribeden soň kabul edildi. Kompaniýanyň elektromobiller üçin ahyrky bahalary bäsdeşlige ukypsyz bolup çykdy, bu hem islegiň pese gaçmagyna getirdi. Şeýle ýalňyşlyklaryň öňüni almak we bolup biljek ýitgileri azaltmak üçin, BMW strategiýa gaýtadan seretmek we elektromobillere ünsi azaltmak kararyna geldi.
Çaklamalaryň peseldilmegi hem häzirki BMW we MINI modellerine, hem 2026-njy ýylda çykarylmagy meýilleşdirilýän elektromobillere degişlidir. Kompaniýanyň üpjünçilik zynjyry bilen tanyş çeşmeleriň maglumatlaryna görä, käbir modelleriň satuwy 20%-den gowrak peseldi.
Şeýle-de, çeşmeler geçen ýyldan bäri BMW-niň çaklamalary yzygiderli azaldýandygyny belleýär. Üpjün edijiler tendensiýanyň dowam etmegine garaşýar. Ýöne BMW-niň soňky satuw çaklamalaryny azaltmagynyň gerimi öňkülerden has uly boldy.
