Habi Alonso Madridiň "Realynyň" täze baş tälimçisi boldy. 43 ýaşly hünärmen bilen baglaşylan şertnama 2028-nji ýylyň tomsuna çenli dowam eder. Ol wezipesine 1-nji iýunda girişer.
2022-nji ýylyň oktýabryndan bäri Alonso Lewerkuzeniň "Baýer" toparynyň baş tälimçisi bolup işledi. Onuň ýolbaşçylygynda klub Germaniýanyň çempionatyny hem-de Kubogyny gazandy. Ozal, 2009-njy ýyldan 2014-nji ýyla çenli Alonso "Realda" futbolçy bolup çykyş edipdi we şol döwürde topar bilen La Ligany we Çempionlar ligasyny goşmak bilen jemi alty kubogy gazandy.
"Baýeriň" baş tälimçisiniň boşan ýerine bolsa 55 ýaşly niderlandly hünärmen Erik ten Hag bellendi. Onuň bilen şertnama 2027-nji ýyla çenli baglaşyldy. Resmi şertnama duşenbe güni gol çekiler.
Ten Hagyň soňky iş ýeri Angliýanyň "Mançester Ýunaýtedi" boldy. Ol bu toparda 2022-nji ýylyň tomsundan 2024-nji ýylyň oktýabryna çenli tälimçi bolup işledi. Bu döwürde topar Angliýanyň Kubogyny we Liganyň kubogyny utdy.
Fabrisio Romanonyň maglumatyna görä, Ten Hag öňki kluby Amsterdamyň "Aýaksyna" dolanmak üçin gowy teklibe garamazdan, Lewerkuzeniň klubuny saýlapdyr. Ol "Aýaksa" 2017-nji ýyldan 2022-nji ýyla çenli tälim beripdi.
