«Disney» mediakorporasiýasy «Ar alyjylar: Kyýamat güni» («Avengers: Doomsday») we «Ar alyjylar: Gizlin uruşlar» («Avengers: Secret Wars») filmleriniň çykarylyşyny yza süýşürdi diýip, «Variety» neşiri habar berýär. Indi bu filmler, degişlilikde, 2026-njy ýylyň dekabrynda we 2027-nji ýylyň dekabrynda görkezilip başlar.
«Ar alyjylar: Kyýamat güni» 2026-njy ýylyň 18-nji dekabrynda prokata çykar, bu bolsa ozalky meýilleşdirilen seneden ýedi aý giçdir.
«Ar alyjylar» filmleriniň yza süýşürilendigi baradaky habar «Disney-iň» filmleriň çykyş tertibine girizen giň gerimli üýtgeşmeleri bilen birlikde yglan edildi.
Şeýle hem kompaniýa birnäçe ady agzalmadyk «Marvel» filmlerini meýilnamasyndan çykardy.
Şeýlelikde, 2026-njy ýylda «Marvel» kinoälemine degişli bary-ýogy iki film çykar: «Ar alyjylar: Kyýamat güni» we «Sony» tarapyndan «Möý adam: Düýbünden başga gün» («Spider-Man: Brand New Day»).
«Marvel» filmleriniň sanynyň azaldylmagy «Disney-iň» baş direktory Bob Aýgeriň öňe sürýän strategiýasyna laýyk gelýär. Ol «Marvel Studios-yň» örän köp film we serial çykaryp, ünsüni ýitirendigini aýtdy. Onuň pikirine görä, ünsi filmleriň hiline jemlemek ýagdaýy gowulaşdyryp biler.
«Kyýamat güni» we «Gizlin uruşlar» filmleri – «Marvel-iň» giň göwrümli taslamalary bolup, olarda köp sanly meşhur aktýorlar çykyş eder. Olaryň arasynda Doktor Dumuň keşbinde gaýdyp geljek Robert Dauni-kiçi hem bar. Şeýle-de «Gök gürrüldedijiler*» («Thunderbolts*»), «Fantastiki dörtlük: Ilkinji ädimler» («The Fantastic Four: First Steps») filmlerinden we «X adamlar» («X-Men») franşizasyndan hem keşpler bolar.
