«Google I/O 2025» konferensiýasynda «Google» kompaniýasy «SynthID Detector» atly ýörite portaly hödürledi. Bu portal emeli aňyň kömegi bilen döredilen sanly mazmunlary barlamaga mümkinçilik berýär.
«SynthID Detector» arkaly ýüklenen faýlyň «Google-yň» EA gurallary arkaly döredilip-döredilmändigini anyklap bolýar. Bu hyzmat «Gemini», «Imagen», «Lyria» we «Veo» modelleri bilen döredilen suratlar, wideolar, ses ýazgylary we tekst ýaly dürli görnüşli mazmunlar bilen işleýär.
Bu tehnologiýanyň esasynda «SynthID» sanly suw belgileri (watermark) bar. Olar mazmun döredilende, awtomatiki görnüşde şoňa ýerleşdirilýär. Bu bellikler faýl çäklendirilse-de, üýtgedilse-de ýa-da sosial torlarda paýlaşylsa-da, şonuň içinde galýar.
Barlag üç ädimde amala aşyrylýar: ilki bilen faýl ýüklenýär, soňra suw belgileri skanirlenýär, soňra bolsa netijeler görkezilýär. Suratlar boýunça belgileriň bolmagy ähtimal ýerler görkezilýär. Ses faýllarynda bolsa ulgam belli wagt aralyklaryny görkezýär.
Hasaplamalara görä, 2021-2024-nji ýyllar aralygynda dipfeýk wideolaryň sany 550% köpelipdir. Şeýle ýagdaýda sanly mazmunyň hakykylygyny barlamak üçin gurallara zerurlyk ýüze çykýar.
«Google» bu portalyň žurnalistler, gözlegçiler we media hünärmenleri üçin dezinformasiýa garşy göreşde peýdaly bolup biljekdigini belleýär. Häzirki wagtda bu gural diňe irki synagçylar üçin elýeterli. Isleg bildirýänler garaşýanlaryň sanawyna goşulmak üçin ýüz tutup bilerler.
Şeýle hem belläp geçmek gerek, «SynthID Detector» diňe «Google-yň» EA gurallary ýa-da bu tehnologiýany ulanýan hyzmatdaşlaryň döreden mazmunlaryny tanap bilýär. Suw belgileri bolmadyk başga ulgamlarda döredilen faýllary tanamaýar.
«Google» ekoulgamy giňeltmek üçin tekst boýunça «SynthID-niň» açyk koduny hemmeler üçin elýeterli etdi we «Nvidia» kompaniýasy bilen hyzmatdaşlykda olaryň «Nvidia Cosmos» hyzmaty arkaly döredilen wideolara suw belgilerini ýerleşdirmek işini ýola goýdy.
