«Kalmar oýny» serialynyň awtory Hwan Don-hýogyň aýtmagyna görä, üçünji möwsümde baş gahryman öňküsindenem has agyr synaglar bilen ýüzbe-ýüz bolar. Bu barada ol «Entertainment Weekly» neşirine gürrüň berdi.
«Üçünji möwsümde ynsan tebigatynyň iň aşak çäklerini görkezýän oýunlar bilen tanyşdyrmak isledim. Sebäbi, serial jemleýji nokadyna golaýlap gelýär, şeýle-de men oýunlaryň örän dartgynly bolmagyny isledim. Men adamlaryň adamkärçilik duýgylaryny nädip saklap biljekdiklerine we hatda iň ýowuz bäsdeşligiň arasynda-da nädip adam bolup galmalydyklaryna üns bermek isledim» — diýip, Hwan Don-hýok aýtdy.
Onuň sözlerine görä, üçünji möwsüm tutuş hekaýanyň soňy bolar. Baş gahryman Son Ki Hun hekaýanyň ahyryna çenli düýpgöter üýtgär.
Täze möwsümiň wakalary gahrymanyň (keşbini Li Jonje ýerine ýetirýär) diri galmak oýnuna dolanyp gelmegini gürrüň berer. Ol täze guramaçylary paş etmek we gatnaşyjylaryň ölmegini togtatmak isleýär. Ahyrynda ol oýunlaryň syrly guramaçysy bilen ýüzleşip, başlanan işi soňlamaly bolar.
«Kalmar oýnunyň» üçünji möwsüminiň premýerasy 2025-nji ýylyň 27-nji iýunyna meýilleşdirilýär. Ýagny ikinji möwsümden bary-ýogy 6 aý soň çykar.
