Käbir arzan awiagatnadyjylar uçarlaryň salonynda dik durulýan orunlary hödürlemek bilen, has köp ýolagçyny ýerleşdirip biler. Daily Mail britan tabloidiniň habar bermegine görä, olar eýýäm 2026-njy ýylda gysga gatnawlarda peýda bolup biler.
Häzirlikçe gürrüň Aviointeriors italýan kompaniýasynyň Skyrider 2.0 modeli barada gidýär. Bu oturgyçlar welosipediňki ýalydyr: ýolagçylar oturgyja daýanýar, ýöne doly oturmaýar.
Skyrider 2.0 ilkinji gezek 2018-nji ýylda Gamburgda geçirilen Aircraft Interiors Expo sergisinde görkezildi. Şondan bäri oturgyçlar kämilleşdirildi – berkidiş güýçlendirildi, amortizasiýa goşuldy, agram bolsa adaty oturgyçlar bilen deňeşdirilende tas 50% azaldyldy.
Oturgyçlaryň şeýle ýerleşdirilmegi ýolagçylaryň sanyny 20% artdyrmaga mümkinçilik berýär we ony iki sagada çenli dowam edýän uçuşlarda ulanmak bolýar.
Häzirlikçe awiakompaniýalaryň hijisi şeýle oturgyçlaryň ornaşdyrylandygyny resmi taýdan tassyklamady. Ýöne Ryanair-iň ýolbaşçysy Maýkl O’Liri muňa gyzyklanma bildiripdi. Ol 2012-nji ýylda 1 funt sterling bahaly petek bilen şeýle orunlardan birnäçe hatar hödürlemek isleýändigini aýdypdy.
Sosial ulgamlarda bu habar, esasan, nägilelik döretdi. Käbir ulanyjylar bu pikiri “adamkärçiliksiz” diýip atlandyryp, şertleri “gullaryňky” bilen deňeşdirdi.
Bahalaryň ep-esli arzanlajakdygyna garamazdan, bu habar ýolagçylary enteg-ä begendirmedi.
