«Perseverance» mars roweri Marsda peýda bolan «tozan arwahyny» tötänleýin görkezýän selfi düşürdi. Ak reňkli, solak, buluda meňzeş girdap enjamdan, takmynan, bäş kilometr uzaklykda peýda boldy diýip, NASA habar berýär.
Bu surat alty tigirli geolog-roweriň Ýezero krateriniň gyrasyndaky «Jadygöý Heýzeliň depesi» atly sebitde wagty düşürilipdir. «Perseverance» soňky bäş aý bäri şol krateri öwrenýär.
Selfi «Perseverance» roweriniň manipulýatoryndaky kamera bilen düşürilen 59 kadryň birleşdirilmegi bilen ýasalypdyr. Roweriň kamera enjamlaryny işläp düzen «Malin Space Science Systems» kompaniýasynyň suratlary gaýtadan işlemek boýunça hünärmeni Megan Wunyň sözlerine görä, bu suratlary düşürmek üçin bir sagat wagt gerek bolupdyr, ýöne çekilen zähmet netijä «mynasyp» bolupdyr.
«Tozan arwahynyň suratda fon hökmünde peýda bolmagy bu suraty hakyky klassyka öwürýär» — diýip, Wu belläp geçdi.
Gyzyl planeta gondurylan gününden bäri, «Perseverance» Marsda eýýäm 1500 sol (Mars güni) ýaşapdyr – bu bolsa Ýerdäki 1541 güne, ýagny 4 ýyl, 2 aý we 10 güne deňdir. Şol döwrüň dowamynda, ol bäş gezek selfi düşüpdir.
Täze düşürilen suratda «Perseverance» enjamynyň birnäçe gaýany burawlamagyň netijesinde dörän gyzylymtyl tozan bilen örtülendigi görnüp dur. Suratyň düşürilen wagtyna çenli ol 37 sany gaýany we uly daşlary işläpdir, 26 sany nusga ýygnapdyr we 36 kilometrden gowrak ýol geçipdir.
