Ford Motor elektromobil işläp taýýarlamak meýilnamasyna gaýtadan seredilendigini habar berdi. Awtoöndüriji Kentukkidäki (ABŞ) akkumulýator öndürýän zawodynyň önümçilik kuwwatynyň bir bölegini Nissan kompaniýasyna kärendesine bermek kararyna geldi.
2021-nji ýylda Ford elektromobil ösüşine 7 mlrd dollar möçberde maýa goýdy. Meýilnama Günorta Koreýanyň SK On kompaniýasy bilen hyzmatdaşlykda akkumulýator önümçiligi boýunça iki zawodyň gurluşygyny öz içine alýardy. Ýöne bazardaky isleg çak edilenden pes boldy. Zawodlaryň biri asla ulanylmady, beýlekisi bolsa doly güýjüne işlemedi, Ford onuň mümkinçilikleriniň diňe bir bölegini öz hajatlary üçin ulanýardy. Şonuň üçin, maglumatlara görä, kompaniýa işleýän zawodynyň önümçilik güýjüniň bir bölegini Nissan-a kärendesine bermek kararyna geldi.
Ýapon kompaniýasynyň maliýe ýagdaýy çylşyrymly bolup galýar. 2025-nji ýylyň birinji çärýeginde Nissan 4,5 mlrd möçberde ýitgi hasaba aldy. Şunuň bilen baglylykda 20 000 işgäri işden çykarýandygyny we Ýaponiýada täze akkumulýator zawodyny gurmak meýilnamasyndan ýüz öwürýändigini mälim etdi.
ABŞ-da önümçilik kuwwatyny kärendesine almak import bilen bagly çykdajylary azaltmaga we Missisipi ştatynyň Kanton şäherindäki zawodda ýolsuz ýerden ýöreýän elektrik ulaglaryň önümçiligini goldamaga kömek eder. Ozal Nissan akkumulýatorlar bilen SK On kompaniýasynyň üpjün etjekdigini tassyklady.
Ford we Nissan kompaniýalarynyň wekilleri teswir bermekden ýüz öwürdi.
