Ýaz pasly başlany bäri Merkezi Aziýa ýurtlarynda birnäçe sebitlerde gurakçylyga getiren aşa yssy howa hasaba alynýar. Maglumatlara görä, soňky 30 ýylda sebitde temperatura 1,5°С ýokarlandy – bu ortaça global görkezijiden iki esse ýokarydyr.
80 million töweregi ilaty bolan Merkezi Aziýa sebiti eýýäm suw ýetmezçiligi bilen ýüzbe-ýüz bolýar. Aýratynam, sähra we çöl sebitleri gowşak bolup galýar.
Ýylylyk tolkuny mart aýyndan bäri dowam edýär. Hünärmenleriň nygtamagyna görä, yssy howa oba hojalygyna, suw üpjünçiligine we adamlaryň hal-ýagdaýyna täsir edýär.
Geçen şenbe güni Gyrgyzystanyň paýtagty Bişkekde temperatura 37,1°С çenli ýokarlandy – bu täze maý rekordy diýip, AFP Gyrgyzystanyň Meteorologiýa gullugyna salgylanyp habar berýär. Aprel aýynda Özbegistanyň köp şäherlerinde kadalydan 5 gradus ýokary bolan yssy howa hasaba alyndy. Anna güni Daşkent maý aýy üçin täze temperatura rekordyna golaýlady.
Kadalydan 2,7°С ýokary temperaturaly gyşy başdan geçiren Gazagystanda eýýäm on bir sebitde gurakçylyk barada habar berildi. Maý aýynda ýurduň çäginde 40°С töweregi temperatura hasaba alyndy. Täjigistanda hem häkimiýetler aşa yssy temperatura barada habar berýär.
Aşa ýokary görkezijiler Aşgabatda hem hasaba alyndy. AFP-yň Türkmenistanyň Meteorologiýa gullugyna salgylanyp habar bermegine görä, aprel aýynda ýurduň paýtagtynda 1891-nji ýyldan, ýagny meteorologiki gözegçilikler başlany bäri ýokary temperatura rekordy goýuldy.
