Apple her ýyl geçirilýän işläp düzüjileriň konferensiýasyny – WWDC 2025-i resmi taýdan yglan etdi. Çäre 9-njy iýundan 13-nji iýun aralygynda geçiriler.
Ol 9-njy iýunda, duşenbe güni sagat 22:00-da (Aşgabat wagty) esasy tanyşdyrylyş bilen açylar.
Çagyrylan gatnaşyjylar kompaniýanyň Kupertinodaky baş edarasy Apple Park-da geçiriljek açylyş dabarasyna gatnaşyp biler. Şeýle-de, olar işläp düzüjiler bilen gürrüňdeş bolmak we ýörite çärelere gatnaşmak mümkinçiligini gazanar. Beýleki isleg bildirýänler çäräni onlaýn yzarlap, sanly görnüşde programma mugt goşulyp biler.
Esasy üns iOS 19 operasion ulgamynyň tanyşdyrylyşyna gönükdiriler. Ulgamyň täzelenen dizaýna we emeli aň bilen baglanyşykly täze funksiýalara eýe bolmagyna garaşylýar. Olaryň arasynda akkumulýatoryň zarýadyny has gowy dolandyryş we jemgyýetçilik Wi-Fi torlaryna has amatly birikme bar. Mundan başga-da, Notes ulanyjylary kiçiräk üýtgeşmä – şriftlerde “a” harpynyň täze şekiline garaşyp biler.
Beýleki täzelikleriň arasynda iPadOS 19 bar. Deslapky maglumatlara görä, ol macOS-yň interfeýsine meňzeş menýuny alar. Ol Magic Keyboard klawiaturasy ulanylan ýagdaýynda ekranyň ýokarky böleginde peýda bolar.
WWDC 2025 bäş gün dowam eder we prezentasiýalary, okuw sapaklaryny we Apple-iň geljekki işläp taýýarlamalary barada maslahatlary öz içine alar.
