Polýar şöhleleriniň we geomagnit tupanynyň dowam edýän wagty, ABŞ-nyň ýaşaýjylary asmandaky geň galdyryjy ýagty zolaga tomaşa etdiler. Garaşylmadyk hadysa köp sanly tomaşaçyny haýran galdyrdy diýip, «Space.com» habar berýär.
Zolak 17-nji maý gijesi Kolorado ştatynyň asmanynda peýda boldy. Ilkibaşda bilermenler muny gün plazmasynyň Ýeriň atmosferasy bilen täsirleşmegi netijesinde, kämahal ýüze çykýan seýrek atmosfera ýagtylanmasy – «Stiw» (Strong Thermal Emission Velocity Enhancement) diýip çaklapdylar. Emma soňlugy bilen, bu ýagtylygyň Hytaýyň «Zhuque-2E» raketasynyň uçurylyşy bilen baglanyşyklydygy ýüze çykaryldy.
Metan ýangyçly «Zhuque-2E» raketasy Hytaýyň Szýusýuan kosmodromyndan, bu hadysa ýüze çykmazdan ozal, takmynan, bir sagat öň uçurylypdyr. Raketa alty sany emeli hemrany orbita ýerleşdiripdir. Hünärmenleriň sözlerine görä, asmandaky ýagty zolak raketanyň galan ýangyjynyň boşadylmagy ýa-da onuň ýanmagy netijesinde ýüze çykan bolmaly.
Astronom Jonatan Makduell X sosial torunda bu zolagyň raketanyň ýokary basgançagynyň Four Corners sebitiniň üstünden, takmynan, 250 km beýiklikden geçişine gabat gelendigini aýtdy.
Şuňa meňzeş hadysalar mundan ozalam birnäçe gezek ýaşaýjylary geň galdyrypdy. Mysal üçin, ozal «SpaceX» kompaniýasynyň «Falcon 9» raketasy uçurylandan soň, asmanda üýtgeşik spiral şekilli bulutlar peýda bolupdy.
