Foxconn Hindistanda öz önümçilik kuwwatyny giňeltmek üçin 1,5 mlrd dollar maýa goýar. Bu Hytaýa garaşlylygy azaltmak we paçlar hem geosyýasy ýagdaýlar bilen bagly töwekgelçilikleri azaltmak strategiýasynyň bir bölegi bolar diýip, Reuters ýazýar.
Bu serişdeleri Foxconn-yň Tamilnad ştatynda ýerleşýän Yuzhan Technology India golçur kärhanasy alar. Maýa goýumlar kompaniýanyň Singapurdaky bölümçesinden geler, ol hindi golçur kärhanasynyň 12,77 mlrd paýnamasyny satyn alar.
Kompaniýa önümçilik göwrümini artdyryp, ýakyn aýlarda iPhone üpjünçiligine başlamagy meýilleşdirýär. 2025-nji ýylyň mart aýynda Hindistandan ABŞ-a 2 mlrd dollarlyk 600 tonna töweregi iPhone eksport edildi. Reuters-iň maglumatlaryna görä, 2024-2025-nji maliýe ýylynda Hindistandan iPhone eksporty 17,5 mlrd dollar boldy – bu bir ýyl ozalkydan iki esse köpdür.
Foxconn-dan başga-da, Hindistanda iPhone önümçiligine Tata Electronics we Pegatron gatnaşýar. Tata ýakynda Apple-iň başga bir hyzmatdaşynyň bir bölegini – Wistron kompaniýasyny satyn aldy we indi beýleki kompaniýalar bilen bir hatarda Apple smartfonlaryny çykaryp biler.
Apple hytaý harytlaryna ýokary paçlardan gaçmak maksady bilen amerikan bazary üçin önümçiligiň esasy bölegini 2026-njy ýyla çenli Hindistana geçirmegi meýilleşdirýär.
Şeýle-de, Foxconn Hindistandaky işgärlerini iki esse artdyrmak isleýär, olaryň sany häzir 40 müň adamdan geçýär. Şol bir wagtyň özünde, kompaniýa hytaýly inženerleri çekmek bilen ýerli hünärmenleri taýýarlaýar.
