BMW şuting-breýk kuzowynda ýerine ýetirilip bilinjek üýtgeşik konsept-karynyň premýerasyna taýýarlanýar. Prototip 23 – 25-nji maýda geçiriljek Concorso d'Eleganza Villa d’Este 2025 awtomobil sergisinde görkeziler.
Şuting-breýk (shooting brake) diýip, sport we dinamiki görnüşe eýe bolan iki ýa-da üç gapyly kupe-uniwersallara aýdylýar. Adaty uniwersallardan tapawutlylykda, olaryň yzky aýnasy we üçegi has ýapgyt görnüşde bolýar, şol sebäpli awtomobil sport kupesi ýaly görünýär.
Awtomobiliň sportkara mahsus ölçegleri, pes kuzowy we 8 seriýasynyň modellerine meňzeş stili almagyna garaşylýar. Muňa BMW-niň baş dizaýneri Adrian wan Hoýdonk tarapyndan hödürlenen suratlardan düşünmek bolýar.
Konsept burçly dizaýny, uly tigirleri we ýönekeý, ýöne stile laýyk yzky fonarlary bilen tapawutlanýar. Käbir hünärmenler onuň 2023-nji ýylda görkezilen Z4 shooting brake-iň pikir dowamy bolup biljekdigini çaklaýar. Ýöne ölçeglerdäki we detallardaky tapawutlar düýbünden täze konsepti görkezýär.
Häzirlikçe kompaniýa tehniki aýratynlyklar we önümçilik meýilnamalary barada maglumat bermedi. Onuň Z4 ýaly ýeke-täk nusgada galyp, köpçülikleýin önümçilige goýberilmezligi-de mümkin.
