Halkara futbol federasiýasynyň (FIFA) girdejisi soňky dört ýylda 6,5 mlrd dollardan 13 mlrd dollara çenli artdy. Bu barada FIFA-nyň prezidenti Janni Infantino guramanyň Asunsýonda geçirilen 75-nji kongresinde eden çykyşynda habar berdi.
“Maliýe barada gürrüň edilende ýene bir zady bellemek gerek. Eger 2019-njy ýyldan 2022-nji ýyla çenli býujete seretsek, bu $6,5 mlrd. 2026-njy ýyla çenli döwür üçin girdeji býujetine seretsek – bu eýýäm $13 mlrd. Biz soňky dörtýyllyk döwür bilen deňeşdirilende girdejini iki esse artdyrdyk, bu hem dürli maksatnamalary durmuşa geçirmäge mümkinçilik berýär. Mysal üçin, Forward programmasy soňky dokuz ýylda ýedi esse ösdi” – diýip, Infantino aýtdy.
Ol girdejiniň ýokarlanmagy netijesinde guramanyň bütin dünýäde futbolyň ösüşine maýa goýup biljekdigini belledi.
“Häzir futbol – iň güýçli sport we dynç alyş görnüşleriniň biri. Biziň hyzmatdaşlarymyz köp we olar FIFA bilen hyzmatdaşlyga buýsanýar, gurama barha güýçlenýär. Näme üçin? Sebäbi biziň dolandyryş ulgamymyz biziň maýa goýumlarymyz, dünýä ykdysadyýetlerine we syýasata bolan gatnaşygymyz bilen berkeýär, sebäbi biz hemmeler bilen gürleşýäris, her bir assosiasiýa üns berýäris. Ine, şonuň üçin biz dünýä derejeli ýaryşlary guraýarys” – diýip, FIFA-nyň prezidenti belledi.
